Hér er sem sagt Garðarinn eins og hann gerist bestur á fögrum vetrardegi og algjörlega með öllu útilokað að ímynda sér að kappinn sé lagður af stað inn í fimmtugsaldurinn. Reyndar minnir þessi mynd eilítið á góðan félaga minn, skegglausan að austan og lesendur hér geta dundað sér við að velta því fyrir sér hver sá myndarmaður gæti verið. Ég er reyndar með eindæmum ómannglöggur eins og alþjóð er kunnugt og því ekki víst að fólk sé sammála mér um hverjum myndin líkist. Því segi ég ekki um hvern sé að ræða nema rétt ágiskun rati í hús.

Er annars kominn á blaðsíðu 166 í Þrúgum reiðinnar.

Og hér kemur svo mynd dagsins...

HRAKFARIR & HEIMSKUPÖR eiga 4 ára afmæli í dag og allir að tjá sig eitthvað í tilefni dagsins...

Og ekki nóg með það heldur var fyrsti vetrardagur nú um helgina og því vel við hæfi að óska landsmönnum öllum gleðilegs veturs.

Mánudagsmynd...

Svínaflensan alræmda virðist vera að ná hámarki sínu hér á landi og nú þegar bólusetningarlyfin eru loksins byrjuð að berast til landsins, keppast heilbrigðisyfirvöld við að sprauta vökvanum í allra mikilvægustu pósta samfélagsins áður en sauðsvartur almúginn fær að berjast um síðustu skammtana. Reyndar finnst mörgum undarleg sú forgangsröðun sem yfirvöld hafa opinberað um hverjir fái fyrstu sprauturnar en í bráðnauðsynlegum hópi starfsfólks í heilbrigðisgeiranum, lögreglu, slökkviliðs og björgunarsveitarfólks má einnig finna alþingismenn!

Þegar bólusetningu þess hóps er lokið er komið að sjúklingum með "undirliggjandi sjúkdóma" og barnshafandi konum en eftir það er öðrum heimilt að mæta. Hvað í andsk... eru alþingismenn að gera í þessum fyrsta forgangshóp? Þeir ganga fyrir ófrískum konum, fötluðum, öldruðum og sjúklingum! Reyndar má sjálfsagt færa rök fyrir að alþingismenn teljist flestir hverjir með undirliggjandi sjúkdóma en þeir eiga ekki að ganga fyrir. Úff, hvað margt er rotið hérna...

Annars er ég kominn á blaðsíðu 69 í Þrúgum reiðinnar en er að spá í að taka Harry Potter maraþon á dvd um helgina. Býst því við að John Steinbeck fái að mestu frí þessa helgi.

Og föstudagsmyndin...

Minntist á það einhvern tímann um daginn að Þriðja tákn Yrsu Sigurðardóttur biði mín þá til lestrar og hún fær ágætis einkunn en reyndar finnst mér bækur hennar einkennast töluvert af því að vera skrifaðar af konu. Ég er ekki að segja að femínisminn skíni í gegn en persónulega finnst mér bara lítið varið í að þurfa að skrönglast í gegnum langar lýsingar á því hvernig drögtum kvenpersónur bóka hennar klæðast, hvaða tegundir ilmvatna þeirra eru eða hvort aðalpersónan notar græna eða rauða papriku í mataruppskriftina. Þetta fer pínulítið í taugarnar á mér. Samt gaman að sjá hvernig æskustöðvar mínar tengjast söguþræði bókarinnar og hvar sjálft þriðja táknið er að finna. Lesið og þér munuð sjá.

Þá las ég Hótel Kaliforníu eftir Stefán Mána en hún er ekki að heilla mig frekar en aðrar bækur þess höfundar. Hins vegar hafði ég nokkuð gaman að Malaranum sem spangólaði eftir finnska höfundinn Arto Paasilinna en sá hinn sami skrifaði einmitt bókina Dýrðlegt fjöldasjálfsmorð sem ég fjallaði um hér. Malarinn sem spangólaði minnir mig að einhverju leiti á Gróður jarðar eftir Knut Hamsun og má þá um leið einnig líkja henni við Sjálfstætt fólk ef einhver vill fara út í samanburð á sérvitringum en eflaust er einhver sem er mér ekki sammála. Nefni engin nöfn...

Í gegnum tíðina hef ég sankað að mér bókum af hinum ýmsu stöðum og iðulega hef ég yfir að ráða um 10-20 bóka stafla sem ég get valið úr það sem mig langar til að lesa hverju sinni. Góði hirðirinn er mín uppáhalds bókabúð og þar er úrvalið einnig fjölbreytilegast og um leið ódýrast en Kolaportið og ýmsir bókamarkaðir hafa einnig reynst ágætlega fram að þessu í leit að góða lesefni. Veturinn er alla vega efnilegur því að í ólesna staflanum mínum bíða meðal annars Þrúgur reiðinnar eftir John Steinbeck, ævisaga Vincent van Gogh eftir Irving Stone, bækurnar Stalíngrad og Fall Berlínar eftir Antony Beevor og Óvinir ríkisins eftir Guðna Th. Jóhannesson svo eitthvað sé nefnt. Og eflaust á ég eftir að grípa með mér fleiri bækur á hundrað kall í þeim Góða á næstu mánuðum. 

Eflaust hljóta einhverjir að líta á bókalestur sem tímaeyðslu og sjálfsagt kunna hinir sömu að spyrja sjálfa sig hvort manngarmurinn eigi sér ekkert líf en ég hef nægan tíma fyrir sjálfan mig og á meðan eru ekki aðrir á heimilinu að býsnast yfir ógerðum hlutum. Þannig er bara frelsið við það að búa einn og hentar mér alveg ágætlega. Ég er piparveinn og er stoltur af því. Það truflar mig lítið þó að ekki sé skipt á rúminu hjá mér nema á hálfs árs fresti, hvort peran í ljósinu yfir eldhúsborðinu sé búin að vera sprungin síðan ég flutti inn eða hvort gosdósirnar í glugganum séu fjarlægðar þegar ekki komast fleiri fyrir.

Ég eyði frítíma mínum að stórum hluta í lestur á meðan aðrir liggja yfir sjónvarpinu eða Internetinu. Það truflar mig ekki neitt þótt Skjárinn sé að breytast í áskriftarstöð og reyndar spái ég því að stöðin verði ekki langlíf þannig. Og yrði það sjálfsagt ekki heldur á hinn veginn. Ég er nánast alveg hættur að villast inn á Feisbúkkið en mér virðist sem sumir eigi þar sér sitt annað (og kannski eina) líf, jafnt í vinnunni sem annars staðar. Minn frítími snýst alla vega að miklu leiti um bækur og hefur alltaf gert.

Og úr því að minnst er á Góða hirðirinn í þessu nöldri öllu er algjörlega réttlætanlegt að birta þessa mynd hér í tilefni dagsins...

Reyndar fór ekkert sérstaklega mikið fyrir hlýindunum, enda kannski ekki við því að búast um miðjan októbermánuð, en hreyfing, húfur og gallar komu í veg fyrir kuldahroll og annan óskapnað við útiveruna.

Hér má sjá hana Kristbjörgu frá Skógum gera heiðarlega tilraun við að reyna að festa börnin sín á bekkjarmynd en ég notaði hins vegar tækifærið og myndaði myndasmiðinn reyna að myndast við að mynda myndefni sitt.

Á ekki von á að fara fleiri vinnuferðir austur fyrir veturinn og get því farið að leggjast undir minn árlega feld, sem undanfarin árin hefur markast frá ca. miðjum október og fram í apríl. Jólin trufla það ferli reyndar eilítið rétt fyrir áramótin en í það minnsta hef ég janúar, febrúar og mars til að hvíla lúin bein og safna kröftum fyrir næstu törn.

En hér er mynd dagsins...