Alltaf gaman að hafa Íslendinga í sínu liði og vonandi notar hann þetta tækifæri til að rífa upp ferilinn hjá sér eftir dapurt gengi undanfarna mánaða eða ára. Veit svo sem ekki hvort kappinn kemur til með að bæta miklu við leik Spurs á einhvern hátt en til þess að komast í liðið býst ég við að hann þurfi að sýna mikið meira af hæfileikum sínum en hann gerði hjá Monaco. Eiður hefur í það minnsta töluverða reynslu, hefur unnið marga titla með stórum liðum og gefur aukna möguleika í sóknarleik minna manna, þannig að ef hann nær að rífa sig upp úr lágdeyðunni og fer að sýna sitt besta, er aldrei að vita nema hann geti eitthvað hjálpað til.

Það hafa þó nokkrir tekið þátt og gefið atkvæði sitt í nýjustu skoðanakönnuninni sem HRAKFARIR & HEIMSKUPARA standa fyrir og augljóslega margir sem hafa skoðun á hvert sé versta lag Íslandssögunnar. Almennt virðist fólk vera á svipaðri skoðun og ég, með þá möguleika sem í boði eru, því enn hefur enginn séð ástæðu til að gagnrýna lagavalið eða benda á lög sem vantar á listann. Þó eru enn þrjú lög á listanum sem hafa ekki fengið nein atkvæði í kjörinu en öll önnur lög hafa verið kosin oftar en einu sinni. Leoncie og Árni Johnsen hafa tekið afgerandi forystu um sæmdarheitið versta lag Íslandssögunnar og berjast nú hatramminni baráttu um hvort "Ást á pöbbnum" eða "Í kartöflugarðinum heima" sé verra.

Staðan er nú hnífjöfn og lögin tvö hafa fengið sitthvor 31,58% kjörinna atkvæða eða samanlagt vel rúmlega helming þeirra atkvæða sem gefin hafa verið. "Ég vil ganga minn veg" og "Fráskilin að vestan" hafa síðan jafn mörg stig í 3. - 4. sætinu en fyrrnefnda lagið hefur oftast verið nefnt til sögunnar, í efsta sætið, í sambærilegum könnunum sem gerðar hafa verið áður. Endilega að kjósa og bendið öðrum að taka þátt. Býst við að hafa könnunina eitthvað áfram fram eftir vetri...

Held að Kristín Hermannsdóttir, veðurfréttakona á RUV, hafi verið að spá svo miklum frosthörkum á næstunni að hún hafi ekki þorað öðru en að mæta í lopapeysu þegar hún var að gera veður út af einhverju hægðardragi, í sjónvarpinu mínu, í gærkvöldi.

Blaðsíða 6281 í Þrúgum reiðinnar...

Súrir hrútspungar, brennd kindaandlit, reykt hvalspik, kæstir hrafnshreifar, útmiginn hákarl, nætursaltað hrútaberjalyng og marflóarétnir hrossabarkar er aðeins brot af því sem snobbaðir Íslendingar leggja sér til munns á slíkum mannfögnuðum en til að lifa herlegheitin af er líka bráðnauðsynlegt að hella oní sig alíslensku brennivíni til að slá á versta bragðið. Áfengið þykir þannig einnig mikilvægt fyrir óminnisþörf morgundagsins af því að hafa lagt sér slíka fæðu til munns.

Eftir um 50 ára þróunar- og markaðsvinnu er svo loksins komið að því að alheimsvæða ósköpin og græðgisfullir útflytjendur, enn uppfullir af íslenska drauminum, keppast nú við að senda út sýrð hrútaeistu í tonnavís. Ég hélt reyndar að við gætum ekki lagst mikið lægra í lúðaskapnum en svona tilraunir eru ekki beint til þess fallnar að bæta mölbrotna ímynd okkar, gagnvart öðrum jarðarbúum, sem er víst ekki mjög beysin fyrir.

Úr því að þorramatur er svona ægilega sniðugur, af hverju hefur þá engum dottið í huga að kolsýra mysu? MYSA SODA! Ég er viss um að Íslendingar eru nógu vitlausir til að láta það slá í gegn hjá sér.

Þrúgur reiðinnar, blaðsíða 5730...

Líkt og á öðrum fjölmiðlum, sem fjalla reglulega um íþróttir, var ég búinn að ákveða að fá handboltasérfræðing til að vera með daglegan pistil og faglega úttekt á leikjum dagsins en varð þar því miður frá að hverfa sökun þess að þeir voru allir uppteknir við að horfa á eitthvað handboltamót í sjónvarpinu. Ég vonast til að geta gert á því bragabót fyrir vetrarólympíuleikana í Mósambikk árið 2013.

Áhugaverð fyrirsögn á frétt hjá Fótbolta.net í dag.

Kominn á blaðsíðu 5312 í Þrúgum reiðinnar...